मोरङ । मोरङको पथरीशनिश्चरे नगरपालिकामा भोली (बैशाख २०)देखि दोस्रो नगर खेलकुद महोत्सव हुँदैछ ।
नगरको युवा तथा खेलकुद विकास समितिको आयोजनामाहुने महोत्सवमा फुटबल पुरुष र महिला, भलिबल पुरुष, क्रिकेट पुरुष, बुद्धिचाल (चेस), कराँते, म्याराथुन महिला, पुरुष, भारोतलान महिला, पुरुष, पौडि महिला, पुरुष गरी आठ वटा इभेन्टमा प्रतिष्पर्धा गराइने आयोजक नगर खेलकुद समितिका अध्यक्ष दीपक राईले बताए ।
हरेक इभेन्टमा खेल विजेता खेलाडीहरुलाई नगद, प्रमाणपत्र र मेडलको व्यवस्था गरिएको शिक्षा बिभाग प्रमुखसमेत रहेका आयोजक समितिका सचिव नवीन खुलालले बताए ।
आठ वटा इभेन्टमा हुने पुरै खेलकुद महोत्सवमा १४ लाख ५० हजार खर्चहुने अनुमान गरिएको सचिव खुलालले बताए । पत्रकार सम्मेलनमा नगर खेलकुद विकास समितिका सदस्य लोकसागर साम्बा, फुटबल प्रेमी भिष्म न्यौपाने लगायतको उपस्थिति रहेको थियो । प्रतियोगिता बैशाख २० गते पथरीशनिश्चरे स्थित प्रस्तावित रंगशालामा उद्घाटन र ३० गते समापन हुने बताइएको छ ।
