२०७४ फागुन ६
काठमाडौं । पार्टी एकता र मन्त्रिपरिषद् बिस्तारमा सहमति जुटाउन प्रधानमन्त्री केपी शर्मा ओली र माओवादी अध्यक्ष प्रचण्ड आज निर्णायक छलफलमा जुटेका छन् ।
दुई नेताको वार्ता भक्तपुरको पुरानो ठिमीस्थित मेडिकल कलेज सन्चालक दुर्गा प्रसाईंको घरमा चलिरहेको छ ।
झापाको विर्तामोडस्थित बी एण्ड सी मेडिकल कलेजका सन्चालक प्रसाईं माओवादी अध्यक्ष प्रचण्ड निकट व्यवसायी हुन् । वर्षमान पुनमार्फत उनी माओवादीमा हावी भएको मानिन्छ । बी एण्ड सी कलेज सम्बन्धनको पर्खाइमा छ ।
यसअघिका एकता बार्ता माओवादी निकट निर्माण व्यवसायी शारदाप्रसाद अधिकारीको मानभवनस्थित निवासमा हुने गरेका थिए ।
पार्किङलगायतका सुबिधाका कारण बार्तास्थल प्रसाईं निवास रोजिएको प्रचण्डका एक सहयोगीले बताए । दुई नेतावीच शनिवार ओली निवास बालकोटमै वार्ता भएको थियो । शीर्ष तहको बार्तापछि पार्टी एकता संयोजन समितिको बैठक बस्ने बताइएको छ ।
