पथरी, स्थानीय समुदायको सक्रिय सहभागितामा दुर्गा माध्यमिक विद्यालयमा व्यापक सरसफाइ कार्यक्रम सम्पन्न भएको छ। असार २५ गते बुधबार आयोजित यस कार्यक्रममा विद्यालय प्रशासन, स्थानीय जनप्रतिनिधि, शिक्षक, अभिभावक र सुरक्षाकर्मीहरूको उल्लेखनीय सहभागिता रहेको थियो।
पथरी शनिश्चरे-७ लामाटोलीस्थित विद्यालय परिसरमा आयोजित यस कार्यक्रममा प्रधानाध्यापक यादव घिमिरे, वडा नं. ७ का अध्यक्ष उद्धवराज बस्नेत लगायत विद्यालय व्यवस्थापन समितिका पदाधिकारीहरू उपस्थित थिए। स्थानीय अस्थायी प्रहरी चौकी किर्तिपुरका प्रतिनिधिहरूले पनि कार्यक्रममा सहभागिता जनाएका थिए।
शिक्षिका लक्ष्मी नेपालका अनुसार यो सरसफाइ अभियान बर्खे विदापछि विद्यालय पुनः सञ्चालन हुनु अघिको तयारीको रूपमा आयोजना गरिएको हो। कार्यक्रम अन्तर्गत विद्यालयको शौचालय, प्राङ्गण र वरिपरिको क्षेत्रमा व्यापक सरसफाइ गरिएको छ।
सरसफाइका साथै विद्यालय परिसरको सौन्दर्यीकरणमा पनि ध्यान दिइएको छ। शिक्षिका दुर्गा कार्कीले जानकारी दिए अनुसार विद्यालय परिसरमा विभिन्न जातका फूलका बिरुवाहरू रोपिएका छन्।
प्रधानाध्यापक घिमिरेले यस अभियानलाई निरन्तरता दिने योजना रहेको बताए। उनका अनुसार आगामी असार २९ गते शनिबार पुनः सफाइ अभियान सञ्चालन गरिनेछ।
यस कार्यक्रमले विद्यालय र समुदायबीचको सहकार्यलाई बलियो बनाउनुका साथै विद्यार्थीहरूका लागि स्वच्छ र स्वस्थ शैक्षिक वातावरण तयार पार्न मद्दत पुर्याएको छ।
