मोरङ । नेपाल आदिवासी जनजाती महासंघले केन्द्रीय समितिले प्रदेश नं.१ को नाम पहिचानका आधारमा राख्न प्रदेश सभालाई आग्रह गर्दै जनताको भावन बिपरित नाम राखिए निर्णायक आन्दोलनमा जाने चेतावनी दिएको छ ।
महासंघको अध्यक्ष गेल्जे लामा शेर्पाले आज (सोमबार) विज्ञप्ति प्रकाशन गरी सो चेतावनी दिएको हो ।
प्रदेश सभाको पहिलो निर्वाचन भएको ५ वर्षे अवधिको अन्तिमसम्म आइपुग्दासमेत प्रदेश को नामाकरण नहुनु आफैमा दुःखद कुरा भएको उल्लेख गर्दै पहिचानको आधारमा नाम राख्नु विज्ञप्ति मार्फत अनुरोध गरिएको छ ।
प्रदेश नं. १ को नाम ऐतिहासिक थाकथलो, भाषा, संस्कृति, सभ्यताको पहिचानलाई सम्बोधन हुने गरी नाम राख्न प्रदेशसभाका सदस्यहरु, राजनीतिक दलका नेता,कार्यकर्ताहरु एवम् समाजिक सांस्कृतिक अभियन्ता, जातिय संगठनका अगुवाहरुलाई महासंघले अपिल गरेको छ ।
सञ्चार माध्यमहरुमा नामको सन्दर्भमा संघीयताको मर्म विपरित षडयन्त्रपूर्ण ढंगबाट बिभिन्न ब्यक्तिहरुको अभिव्यक्ति आइरहेको प्रति महासंघले भत्र्सना गरेको छ ।
पहिचानको आधारमा नाम राख्न आवश्यक परे नेपाल आदिवासी जनजाति महासंघको साथ सहयोग र समर्थन रहने उल्लेख छ ।
नामको सन्दर्भमा आदिवासी जनजातिको अपेक्षा र अनुरोधलाई बेवास्ता गरी पहिचानको मूल भावनालाई सम्बोधन नगरी नाम राख्ने दुश्प्रयास भए त्यसको बिरुद्ध महासंघले सशक्त र निर्णायक आन्दोलन जाने चेतावनी समेत दिएको छ ।
