मोरङ । बैशाख ३० गते हुने स्थानीय तहको निर्वाचनमा मोरङको पथरीशनिश्चरेन नगरपालिकामा केन्द्रीय सर्कुलर अनुसार चार दलीय गठबन्धन हुने भएको छ ।
नेपाली कांग्रेस नगर सभापति रुपनारायण भट्टराईको अध्यक्षतामा भएको बैठकले नगरमा चार दलीय गठबन्धन गर्ने निर्णय भएको हो ।
कांग्रेस, नेकपा (माओवादी केन्द्र), नेकपा (एस) र जसपावीचको बैठकले नगरमा केन्द्रीय सर्कुलर अनुसार गठबन्धन भएर निर्वाचन लड्ने निर्णय गरेको माओवादी केन्द्रका नगर ईन्चार्ज दिनानाथ तिम्सिनाले बताए ।
बुधबार भएको बैठकले कांग्रेस सभापति भट्टराईको संयोजकत्वमा चार दलको तीन तीन जना पर्नेगरी १३ सदस्यीय संयन्त्र गठन गरेको छ । पथरीशनिश्चरेमा १० वटा वडा रहेको छ । दलहरुले कति, कति र कुन कुन वडा पाउने भन्ने बिषयमा सुक्रबार बस्ने बैठकले निर्णय गर्ने जसपाको केन्द्रीय सदस्य लोकसागर साम्बाले बताए । नगर प्रमुख र उपप्रमुखमा जिल्ला संयन्त्रबाट आउने निर्णयमा भर पर्नेछ ।
